0815    浸完溫泉凸別好訓，不過都要起身汁包伏走佬

0900    食個豐富早餐，準備迎接今日o既豐富節目

1000    搭巴士去火車站出省城 lu，不過落住雪企o係條街等巴士都好鬼凍o下

1045    日本 JR 火車真係好準時，所以千其唔好遲到

1215    搭一個鐘火車就出返去第一晚o係札幌住過果間酒店，間酒店都好市正，仲有一次浸浴送，不過唯一缺點係出去市中心要搭20分鐘地鐵

1245    去到酒店未 check in 得，所以放低包伏就又繼續出去遊山玩水喇

1320    今日o既目的地係小樽，o係札幌搭 40 分鐘左右火車就到，不過果日天氣都唔係咁好，一出火車站就橫風橫雪，由火車站行去條運河都要行十至廿分鐘左右，感覺好似o係度橫越北極咁！

1345    幾經艱苦終於行到去條好出名浪漫o既小樽運河果到，好彩行到去時就冇咁大雪喇，可能係日光日白o既關係，我覺得條河好似雞寮果條咁，唯一唔同係冇咁臭

1400    o係條河行o左幾分鐘就行完，因為條河都真係好短o下，跟住就去o左食晏喇

1410    凍冰冰食雪糕……

1500    食完o野就繼續尋歡喇，其實小樽都好多o野行，不過可能因為賣果 D o野唔係咁o岩我呱，但係果 D 玻璃精品都好精緻o下，如果有機會去又想買o既都幾頭痛，因為易打爛都唔知點拎返香港

1600    落住雪咁行街都好煩o下，條路又跣又凍，由街頭行到街尾都差唔多行o左成個鐘，行到支力當然要坐低飲杯o野休息o下啦，呢間銀之鐘起初覺得佢好搵笨，因為佢要你幫襯佢買一隻咖啡杯先有得飲，但咖啡茶係任飲o既，只要你買o左隻杯就得喇，初初覺得出面自動贖賣機果 D 一罐都只係 120 日圓，呢度最平一隻杯都要四百幾五百日圓，所以覺得有 D 唔抵，但諗諗o下又唔係喎，因為佢可以 refill 任飲，如果飲返佢五六七杯都o係返度，同埋我o地都蠢o左，我o地買o左兩隻杯一人一杯，其實如果買一隻杯兩份飲都得，因為我o地都只係志在飲杯o野坐o下唔係為o左買隻杯嘛，不過有 D 貴 D o既杯就真係幾靚o既，同埋佢係預你飲完拎走隻杯留念o既，連洗杯費佢都可以慳返，所以話日本佬真係好識做生意囉，後o黎俾我諗到條絕世方程式，就係飲完拎走隻杯啦，咁出去行一輪又返入o黎拎返隻杯出o黎又繼續飲，飲完坐完又出去行一輪又返入o黎又飲，咁就可以不停飲o野又勁抵喇，嘿嘿~~~~

1700    炭夠之後又起程去自家製音樂盒，今次我o地又係蠢o左，因為間小樽音樂博物館六點打烊，我o地又行到最尾先搵到去，所以只得一個鐘左右俾我o地行，晌好短時間之內揀材料整，都幾哩 hea，如果有幾會去北海道又會去小樽的話，應該搭 JR o係南小樽站落車一邊行一邊玩咁過返運河果邊，之後食埋o野先返酒店咁就會好 D

1830    整完音樂盒就行返過運河果邊聽喇，果然夜晚係會靚 D o既不過部相機仔拍夜晚就真係嘛嘛o地喇

1900    今晚又係豐富晚餐，有好好味o既三文魚籽海膽蓋飯同埋新鮮好味刺生，食完又係要叫蝕該衣痾衣撕果隻囉

2020    食飽想訓，原先諗住再去札幌行o下先都冇去喇，直接搭 JR 返酒店休息 lu

    ↖ˍˍ Hokkaido2007