今日又係同上個星期一樣
收工返屋企訓一陣就又出去睇樓喇

今日終於遇到 D 唔憂做o既 sell 屎
佢問我o地想搵 D 咩盤？
我o地答佢有冇 XX 苑睇o下？
佢好迷糊咁又問非所答
咁我o地又唔理佢繼續睇o下啦
之後佢又問我o地想搵 D 咩盤？
咁我o地又答佢仲有冇 XX 苑睇o下？
佢懶係諗o左一陣話有個中層單位六百幾呎一百七十萬
然後佢有問我o地想搵 D 咩盤？
跟住我就指住佢個廚窗問有冇 XX 苑依個單位睇o下？
佢答我o地話已經冇o左
我o地見佢拾o下拾o下都唔想再打攪佢喇
但我o地行去第二間入去又問有冇 XX 苑依個單位睇o下？
A 望o下 B 然後又好迷網咁左摷又摷
跟住又問 B 有冇
B 答佢唔知老闆擺o左o係邊
之後又好似唸咒語咁我都聽唔明
我見係咁都係算罷啦就走喇……

最後去o左果間都好彩遇到個正常人
好順利咁睇o左目標屋苑一個五百幾呎o既單位
睇完又去o左另一個屋苑睇兩個單位
睇完都覺得可以考慮
睇咁多個盤以o黎第一個單位係睇得上眼o既
可惜就矮得滯
所以想盡快睇多幾個先再決定
希望到時仲有得揀啦