今日一朝六點就要起身
因為要搭早車出札幌

十一點幾出到省城
一行五人拎住勁多包袱行去酒店
成條車隊咁非常壯觀

去到酒店因為未可以 check in
所以擺低行李就出去行街食飯
好可惜係搵o左好耐都搵唔到有 Gear 賣
唔知係汁哂凹定係小o左人玩 snowboard 呢？
所以今年買唔到 D 平靚正o既裝備 lu

行到十二點幾一點
我o地就搭車去二條市場食 lunch
果度 D 海鮮真係平靚正（雖然都係好貴……）
但勝在夠新鮮
我o地食o左三文魚子加海膽飯、海鮮飯同埋松葉蟹腳
果種好味度真係唔識形容囉
如果唔係懶得拎
我諗我都會買隻蟹同埋勁大粒元貝返o黎做手信o架

食飽個豐富午餐後就自由活動繼續行街 shopping
但都係果句
想搵就搵唔到
要乜就冇乜
仲要呢度仲貴過o係雪場買
所以行o左好耐都係得個吉

行到四點就返o左酒店 check in
呢間酒店雖然平
但都幾企理喎
間房感覺上比二世古果間仲好 D 添

o係酒店攪o左一輪安頓好後又出街繼續行街 shopping
行到夜晚八點先去食晚餐
最後的晚餐我o地揀o左食湯咖哩
但o係狸小路果間因為已經賣哂冇得食
所以我o地又要週圍搵食喇
又好好彩俾我o地搵到第二間食湯咖哩喎
不過要等成半個鐘先有位
但食完之後又覺得幾好食喎
如果再有機會一定要再去食過

話咁快就最後一夜喇
次次旅行最後一晚都係好唔捨得咁
因為聽日就要走又要返工又要捱喇……
今次旅行雖然都有少少阻滯
但都好好彩可以順利完成
希望過埋今晚
下年真係可以再原班人馬再加多其他隊員
再一齊去挑戰其他雪場啦！

    ↖ˍˍ Hokkaido2008