較o左鬧鐘四點半醒
不過都係好可惜烏雲密怖睇唔到
所以睇o左一陣就都係訓多陣好過……
訓到六點幾七點開始混亂喇
因為一屋都係人但廁所得一個……
所以其實都幾麻煩但又幾得意
好似以前去宿營咁幾好玩
梳洗完畢後就集體食早餐
早餐亦都係好豐富o下
食飽後就出車再去琴日冇去o既地方
首先係去o左個海岸
有燈塔有吊橋
據聞午夜兇鈴有幾幕都係o係呢度拍o既
睇完之後就專程去買煙花準備今晚有得玩
不幸o既事情又再次發生喇
話說我落車去買煙花
買完返去架車度擺低果袋煙花之後
阿車長就唔等我開車喎
最攪笑係全車人都知我未上車只係車長唔知
直頭好似吳孟達同周星馳做逃學威龍咁
"我未上車喎！"
當然最後都上o左車
如果唔係都唔知點返屋企……
做完場鬧劇之後就返酒店 check out 攞行李
繼續第三天o既行程
到o左呢一刻
感覺係好似已經玩o左五日咁
其實只係開始第三日……
第三日o既正式行程係去睇好出名又好貴o既溫室密瓜
望住成棚密瓜吊吊 fing 都幾得意
我o地買o左一個四千五百yen
一個二千五百yen試o下有咩分別
不過冇得即場食
要今晚返到酒店先有得食
但我o地都有發揮我o地o既專長
食雪糕都可以玩一餐……
食完玩完後就出發去下個景點
途中呢……經過超市又沖o左入去買o野食
今次直頭買埋午餐o係車到野餐添
我估 D 日本仔見到我o地隨街食o野會好奇怪
但我o地又食得好滋味喎
食飽仲集體食蕉添！
食完個午餐就繼續前進向山葵田出發
不過去到都只係遠觀
冇落到去田摘山葵
我o地泊好車後只係入o左旅遊書有介紹果間鋪頭望o下
點知我o地見個老闆就係書入面介紹果位人兄
見到咁o既情形當然又係個個都傻o左咁當個老闆係景點咁係咁同佢影相
睇見咁o既情況都幾好笑
連個老闆都以為自己做o左大明星咁
嘿嘿~~~~
買完山葵之後馬不停蹄繼續趕路
跟住落o黎個景點七滝瀑布都幾好睇
聽聞話係由七條瀑布會合成一條大瀑布
所以就咁勁喇
o係個七滝瀑布又有小插曲
就係話說冇 D 無料駐車場比我o地泊車啦
咁我o地就泊o左o係間士多鋪側邊果 D 停車場
但語言不通可能佢要我o地幫襯佢先可以泊車
咁我o地成棚人只係買o左一包阿婆餅就立即沖哂落去睇瀑布
諗起都有 D 過份但又好過瘾喎
hehe~~~~
睇完七滝瀑布後有個加料景點龍捲風灣
成班友仔當o左個車做過山車咁大叫
唔知有冇嚇親人呢？
玩o左成日都係時候返酒店落腳喇
今晚我o地會去土肥一間溫泉酒店叫大和館
佢聲稱可以浸住露天溫泉睇日落o既
但我o地入到去就發覺有 D 唔對路
首先係個溫泉點解唔係露天o既
咁我o地當然要搵o下原因究竟發生咩事啦
原來個露天風侶唔係o係呢層
而係o係六樓再行幾層樓梯落去先到
當然身水身汗落到去個景色確係唔同 D 啦
不過山長水遠先行到去
仲要多雲冇日落睇添
真係 call now yeah！
夜晚餐飯比起琴晚果餐就真係……唉！
不過食飯之後我o地又好似琴晚咁六個人迫一個房
讓o左間房比新婚夫婦渡密月
最攪笑係我o地全體都認為食飽訓一訓先出去放煙
一熄燈又真係個個都訓哂教
仲要係成間房好似交響樂咁鼻塞聲四起
本來話訓半粒鐘卒之個個訓到唔願起身要加時十五分鐘添
小睡遍刻確係唔同 D
跟住就揸車出o左去海邊放煙花
玩到個個成身火藥味好鬼開心
最後玩到落雨先拿拿淋放哂 D 軍火就沖上車返酒店
沖個涼就躂落塌塌米昏迷o左 lu
